L-Awtorità Reġjonali għall-Iżvilupp ta’ Għawdex (GRDA) tixtieq tiċċara xi punti fir-rigward tal-proġett propost tal-Gozo Rural Airfield.
Il-proġett tal-Gozo Rural Airfield kien suġġett għal konsultazzjoni pubblika wiesgħa matul l-2022 bħala parti mir-Regional Impact Assessment Studies (RIAS) mwettqa mill-GRDA. F’dan il-proċess ta’ konsultazzjoni, li kien miftuħ għall-kulħadd, ġew ikkunsidrati l-impatt ekonomiku, soċjali u ambjentali tal-proġett propost. Id-dettalji tal-konsultazzjoni pubblika u l-istudji jinstabu fuq il-websajt tal-GRDA [https://grda.mt/consultation/gozo-airfield/]. Sommarju tal-proċess jista’ jinstab f’dan id-dokument [https://grda.mt/…/Regional-Impact-Assessment-July2022.pdf].
Saru laqgħat estensivi ma’ diversi entitajiet, kemm lokali kif ukoll nazzjonali, fosthom mal-Kunsill Lokali tax-Xewkija fis-16 ta’ Mejju 2022. Fil-fatt dan joħroġ ċar mill-minuti tal-Kunsill Lokali datati 17 ta’ Mejju 2022 [https://xewkijalc.gov.mt/…/uploads/2022/10/Laqgha-37.pdf]. Saret ukoll laqgħa mall-Kunsill Lokali ta’ Għajnsielem fit-18 ta’ Mejju 2022 [https://ghajnsielemlc.gov.mt/…/Laqgha-Nru.-39-li-saret…]. Dawn saru peress li l-proġett propost jaqa’ fil-konfini ta’ dawn iż-żewġ kunsilli.
Apparti dan saru żewġ laqgħat pubbliċi fid-19 u l-20 ta’ Mejju 2022, fejn l-attendenza għal dawn kienet waħda numeruża u l-pubbliku prezenti kellu l-opportunità jistaqsi, jaqsam opinjonijiet u s-suġġerimenti.
Minbarra r-RIAS imwettqa mill-GRDA, fejn l-Awtorità ħadet in konsiderazzjoni diversi suġġerimenti li saru, inbeda proċess sussegwenti u separat bis-sottomissjoni tal-applikant mal-Awtorità tal-Ippjanar.